Şimali Koreya qoşunları Rusiyadadır - Pentaqon təsdiqlədi

Yazar Bizimxəbər 2024-10-24 12:00:38 2412

ABŞ-ın müdafiə naziri Lloyd Ostin Şimali Koreya qoşunlarının Rusiya ərazisində yerləşməsinə dair sübutların olduğunu bildirib. Amma Pentaqon rəhbəri bu qüvvələrin Rusiya ərazisində olmasının məqsədi ilə bağlı təfərrüatları açıqlamaqdan çəkinib.

Bizimxeber.az bildirir ki, bu barədə məlumatı "Reuters” yayıb.

"Rusiyada Şimali Koreya qoşunlarının olduğuna dair sübutlar var. Onlar dəqiq nə edirlər? Bunu görmək qalır. Bunlar bizim həll etməli olduğumuz şeylərdir", - Ostin Romada jurnalistlərə deyib.

İddiaya görə, Şimali Koreya Rusiyaya elit xüsusi əməliyyat bölmələri də daxil olmaqla 12 min əsgər göndərib. Baş Kəşfiyyat İdarəsinin rəhbəri Kirill Budanov bildirib ki, KXDR-in ilk hərbçilərinin sabah, 23 oktyabr 2024-cü ildə Rusiyanın Kursk bölgəsinə gəlməsi gözlənilir. Onların nə qədər olacağı və necə təchiz ediləcəyi hələlik məlum deyil.

Bundan əvvəl KİV Şimali Koreyanın Ukraynaya qarşı müharibəsində Rusiyaya kömək etmək üçün təkcə quru qoşunlarını göndərmədiyini yazmışdı. Oktyabr ayında Rusiya hərbi təyyarələrini idarə edə bilən qırıcı pilotlar da Rusiya Federasiyasına gəliblər. Təlim üçün gəlmiş ola bilərlər, amma Rusiya Federasiyasının onları müharibəyə cəlb etməsi mümkündür.

Şimali Koreyanın Ukraynadakı müharibədə iştirak etmək üçün qoşun hazırlaması ilə bağlı xəbərlər "münaqişənin mümkün gərginləşməsi ilə bağlı narahatlıqları artırıb”.

Ekspertlər qeyd edirlər ki, bu addım Pxenyanla Moskva arasında münasibətlərin dərinləşməsindən xəbər verə bilər, baxmayaraq ki, Şimali Koreya əsgərləri "sadəcə top yemi” ola bilər.