NATO 5 min alman əsgərini Litvaya yerləşdirir

Yazar Bizimxəbər 2024-04-08 13:46:34 3043

Bazar ertəsindən etibarən, təxminən beş min nəfər olacaq Alman briqadası tədricən Litvaya göndərilir.

Bizimxeber.az bildirir ki, bu barədə "LRT" məlumat verib.

Aprelin 8-də Vilnüsdə ilk iyirmi alman əsgəri və Alman Quru Qoşunlarının komandanı qarşılanacaq. 

İlk alman ordusu Vilnüsdə məskunlaşacaq və briqadanın Litvaya köçürülməsi üçün gələcək tədbirləri planlaşdıracaq və onların yerləşdirilməsi üçün bütün lazımi addımları əlaqələndirəcək. 

Xatırladaq ki, 2023-cü ilin sonunda Almaniya və Litvanın müdafiə nazirləri uzun müzakirələrdən sonra alman briqadasının Litvada yerləşdirilməsi ilə bağlı fəaliyyət planı imzalayıblar.

Hazırda Almaniyanın cənubunda yerləşən 122-ci mexanikləşdirilmiş batalyon və ölkənin qərbində yerləşən 203-cü mexanikləşdirilmiş batalyon ölkəyə təhvil veriləcək.Bu qoşun Litvada olan NATO-nun sürətli cavab qrupu briqadanın tərkib hissəsinə çevriləcək. 

Almaniyanın müdafiə naziri Boris Pistorius briqadanın tam şəkildə yerləşdirilməsinin 2027-ci ilə qədər başa çatacağını bildirib. 

Ümumilikdə, hərbçi və mülki şəxslərdən ibarət təxminən beş min nəfər gəlməlidir. Onların bəziləri ailələri ilə köçəcək. Xidmət yerləri Rudninkay və Rukla şəhərlərinin ərazisində yerləşəcək, lakin hərbçilər və ailələr üçün yaşayış yerləri Vilnüs və Kaunasda da təşkil olunacaq.