Amnesty İnternational Azərbaycan prezidentinə iqtisadçı və siyasi fəal Qubad İbadoğlunu dərhal azad etmək çağırışı yer alan məktubla müraciət edib.

Təəssüf ki, İbadoğlunun payına düşən, ədalətsiz həbs, səhhətinin pisləşməsi və zəruri tibbi yardımın göstərilməsindən imtina ilə özünü büruzə verən çətin sınaq 274 gündür davam edir, deyə məktubda bildirilir.

22 aprel 2024-cü il tarixində İbadoğlu Kürdəxanı istintaq təcridxanasından ev dustaqlığına keçirilsə də, onun azadlığı hələ də əsassız ittihamlar və sərt məhdudiyyətlər məngənəsindədir.

23 iyul 2023-cü ildən etibarən saxlanılan İbadoğlunun həbsi onun korrupsiyaya qarşı mübarizəyə sarsılmaz sadiqliyinə və hökumətin ədalətsizliyinə qarşı narazılığını ifadə etməsinə görə amansız qisasdır. Onun saxta valyuta ilə bağlı sövdələşmələrdə iştirak və əsassız dini ekstremizm ittihamları ilə həbsi Azərbaycanda fərqli düşünənlərin sistemli şəkildə təqib edildiyini göstərir, deyə məktubda qeyd edilir.

Amnesty İnternational-ın bəyanatında əsas yeri İbadoğlunun səhhəti ilə bağlı ciddi problemlərin həll edilməsi zərurəti tutur. Onun ürək xəstəlikləri, 2-ci növ şəkərli diabet, böyrək xəstəlikləri və kürəyində dəhşətli ağrılarla bağlı ağır vəziyyəti dərhal diqqət yetirilməsini tələb edir. Onun ev dustaqlığına keçirilməsi zahirən onun səhhətindəki bu problemləri təsdiq edirdi, lakin o, adekvat tibbi müalicə əldə etmək imkanından məhrum olduğu üçün reallıq acınacaqlı olaraq qalır. 

Amnesty İnternational-ın məktubunda İbadoğlunun əsas hüquqlarının təmin olunmasından imtina olunduğu qeyd edilir və ədalətli məhkəmə çağırışı yer alır. Təşkilat prezident Əliyevi İbadoğluna qarşı bütün ittihamları ləğv etməyə, həm də onun xaricdə zəruri tibbi yardımı almaq üçün Azərbaycandan çıxışına şərait yaratmağa çağırır. Bundan başqa, məktubda hökumət israrla ölkə daxilində təxirəsalınmaz tibbi ehtiyaclarının qarşılanması üçün xarici tibb işçilərinin İbadoğluna kömək etməsinə icazə verməyə çağırılır.

Amnesty İnternational Azərbaycanda tənqidçilərin və dissidentlərin təqibi məqsədilə cinayət məhkəməsi sistemindən sui-istifadələrə son qoymağa, həmçinin Azərbaycanda hüquq müdafiəçilərinə, fəallara və jurnalistlərə qarşı siyasi motivli bütün ittihamları dərhal ləğv etməyə çağırır.