Aİ sərhədlərdə biometrik nəzarət sisteminin tətbiqini təxirə saldı

Yazar Bizimxəbər 2024-10-11 15:01:18 4860

Avropa İttifaqı noyabrın 10-da baş tutmalı olan Avropa İttifaqına daxil olmayan vətəndaşlar üçün yeni biometrik giriş nəzarət sisteminin tətbiqini təxirə salır. 

Bu barədə Bizimxeber.az "Reuters"ə istinadən xəbər verir. Aİ-nin daxili işlər üzrə komissarı İlva Yohansson sistemin planlaşdırıldığı kimi, noyabrın 10-da işə salınmayacağını söyləyib. "10 noyabr artıq masada deyil", deyə Yohansson bildirib. 

Onun sözlərinə görə, yeni cədvəl yoxdur, lakin bunun mərhələli şəkildə tətbiq edilməsi nəzərdən keçirilir. Giriş/Çıxış Sistemi (EES) səyahət sənədini biometrik şəxsiyyət məlumatları ilə əlaqələndirən rəqəmsal qeyd yaradacaq və Aİ-nin xarici sərhədində pasportların əllə möhürlənməsi ehtiyacını aradan qaldıracaq.

Bu, Şengen zonasına gələn Aİ-yə daxil olmayan vətəndaşlardan barmaq izlərini qeydiyyatdan keçirməyi, üzlərini skan etməyi və səfərləri ilə bağlı suallara cavab verməyi tələb edəcək.

Lakin Almaniya Daxili İşlər Nazirliyinin sözçüsü bildirib ki, sərnişin axınının 40%-ni təşkil edən üç ölkə EES-in tətbiqinə hazır deyil, çünki "AB eu-Lısa Agentliyinin təmin etməli olduğu mərkəzi EES sisteminin lazımi sabitliyi və funksionallığı hələ əldə edilməyib".

EU-Lisa Aİ-də irimiqyaslı İT sistemlərinin tətbiqinə cavabdeh olan agentlikdir. Fransa Daxili İşlər Nazirliyi bildirib ki, Fransa EES-in faydalılığına əmin olsa da, onun tətbiqi lazımi səviyyədə hazırlanmalıdır. Sistemin tətbiqi üçüncü dəfədir ki, təxirə salınıb.

Sistem keçən yay tətbiq edilməli idi, lakin Fransa bunun keçən payızda keçirilən reqbi üzrə Dünya Kubokuna və bu yay Olimpiya Oyunlarına ev sahibliyi etməsinə mənfi təsir göstərəcəyindən narahatlığını ifadə edib. Sistemin tətbiqi bu ilin oktyabr ayının 6-na keçirilib, sonra yenidən noyabr ayına qədər təxirə salınıb.