div align="right">

Partiya sədrlərindən dünya azərbaycanlılarına çağırış: “Belə məqamda...”

12:56 - 24 İyul
    2275 oxunma

"Dünyanın bir sıra şəhərlərində keçirilən Qarabağ aksiyaları bundan sonra da yalnız yerli qanunlar əsasında, heç bir təxribata uymadan, zorakılıqlara yol vermədən davam etdirilməlidir". 

Bizimxeber.az xəbər verir ki, bunu Müsavat Partiyasının başqanı Arif Hacılı Amerika və Avropada azərbaycanlılarıyla ermənilərin əlbəyaxa davalarına münasibət bildirərkən deyib. Partiya başqanının fikrincə, Brüsseldə 10 nəfərin hücumuna baxmayaraq, iradə və məğrurluq nümayiş etdirən soydaşımızın davranışı təbliğ və təqdir olunmağa layiqdir:

"Los Ancelesdə, Brüsseldə baş verən vəhşiliklərə adekvat cavab verilməməlidir. Hələlik bu hadisələrə ən düzgün cavab Brüsseldə soydaşımızın məğrurluğu, həm Brüsseldə, həm də Los Ancelesdə günahkarların həbs edilməsidir. Digər davranışlar bütün dünyada millətimizə qarşı misilsiz təbliğat kampaniyasına, haqlı olduğumuz yerdə haqsız duruma düşməyimizə səbəb olacaq".

Ümid Partiyasının sədri İqbal Ağazadə isə Rusiyada yaşayan azərbaycanlılara müraciət edərək savaşın Qarabağda gedəcəyini vurğulayıb: "Loc-Ancelesdə, Brüsseldə ermənilərin azərbaycanlılara qarşı törətdiyi vəhşilikdən sonra Rusiyada da anoloji hadisə təkrarlandı.

Ermənilər azərbaycanlını döyərək video çəkiliş edib sosial şəbəkələrdə yaydılar. Bu gecə buna cavab olaraq Rusiyanın bir sıra şəhərlərində azərbaycanlılar baş verən hadisələrə cavab məqsədilə emosional addımlar atıblar. Rusiyada yaşayan soydaşlarımıza müraciət edirəm: Ermənistanın təcavüzkar siyasətinin durdurulmasına qarşı dünyanın hər yerində göstərdiyimiz milli birliyimiz düşmənlərimizi də ciddi narahat edir. Haqq işimizdə bizə dəstək vermək istəyən başqa millətlərin də sayı günbəgün artır.

Belə məqamda təxribat törədərək bizi qarşıdurmaya çəkmək istəyən xüsusi qüvvələr var və olacaq. Sizi bu təxribatlar vasitəsilə qeyri-qanuni müstəviyə çəkməklə həyatınızı, əmlakınızı, iş yerlərinizi təhlükə altında qoyub zəiflətmək məqsədi güdürlər, birliyimizi pozmağa, bizi dinc müstəvidən savaş müstəvisinə çıxarmaqla haqlı işimizi haqsız göstərməyə çalışırlar. Durun! Bu sizlərə, xalqımıza qarşı böyük təxribatdır. Heç kimin emosional çağrışlarına uymayın. Mən hamının yanğısını, nifrətini anlayıram.

Lakin bu çıxış yolu, problemin həlli variantı deyil. Müharibə orda getmir, siz orda hansı qeyrət, güc göstərsəniz də, Qarabağda heç nə dəyişməyəcək. Savaş Qarabağda olacaq. Siz yaşadığınız yerlərdə bizim haqq işimizi müdafiə edən digər millətlərin sayını artırın, xalqımıza qarşı sevgi formalaşdırın. İmkanlarınız güclü, münasibətləriniz hüquqi olsun. Hamınızı bu təxribatlara uymamağa, olduğunuz yerlərdə qeyri-qanuni addımlar atmamağa, gücünüzü Qarabağda başlayacaq son döyüşə saxlamağa səsləyirəm".

Bizimxeber.az

Daha tez məlumatlanmaq üçün yeni Facebook səhifəmizi

Şərhlər



Haqqımızda

“BizimXƏBƏR” Media Mərkəzi MMC
Baş redaktor Ədil Hüseynli
Şef redaktor Şaiq Mustafayev

Bizimxeber_az@mail.ru;adil-1980@mail.ru
Mobil və Whatsapp  -  (077) 611-44-00; (050) 514-27-84