Ukraynadan taxıl ixracına dair sazişin - Detalları

Ukraynadan taxıl ixracına dair sazişə əsasən minalardan təmizləmə aparılmayacaq. Yeniavaz.com TASS-a istinadla xəbər verir ki, bu barədə BMT-nin yüksək rütbəli rəsmisi bildirib.

"Biz qərara gəldik ki, təhlükəsiz dəhlizlərdən istifadə etmək daha səmərəli olacaq, bunu Ukrayna tərəfi müəyyənləşdirəcək. Bu gəmilər ukraynalı pilotların müşayiəti ilə aparılacaq", - o əlavə edib.

BMT-nin yüksək rütbəli rəsmisi bildirib ki, Ukraynadan taxıl ixracına başlamaq bir neçə həftə çəkəcək.

O qeyd edib ki, tərəflərin Birgə Koordinasiya Mərkəzini tamamlamaq, yoxlamalar aparmaq üçün qruplar yaratmaq, Ukrayna limanlarında taxıl ixracına hazırlaşmaq üçün vaxt lazımdır.

BMT-nin yüksək səviyyəli rəsmisi İstanbulda imzalanan taxıl müqaviləsinin müddətinin uzadılma ehtimalı ilə birlikdə 120 gün olduğunu bildirib. Onun sözlərinə görə, sazişə uyğun olaraq üç Ukrayna limanından təhlükəsiz dəhlizlər vasitəsilə taxıl ixracı ayda təxminən 5 milyon ton təşkil edəcək.

O bildirib ki, Birgə Koordinasiya Mərkəzi gəmilərin müəyyən təhlükəsiz dəhlizlərdə hərəkət etməsini və mümkün insidentlərə reaksiya verməsini də təmin edəcək.