Rusiyaya dəstək veren ölkələr üçün Avropa İttifaqından yeni sanksiyalar

Yazar Bizimxəbər 2023-05-04 18:50:00 3211

Avropa İttifaqı Rusiyaya qarşı tətbiq edilmiş məhdudiyyətlərdən, xüsusən də malların və ya texnologiyaların idxalı ilə bağlı məhdudiyyətlərdən yayınmağa mane olmayan üçüncü ölkələrə qarşı yeni sanksiyalar mexanizmini müzakirə edir.

Bizimxeber.az Bloomberg-ə istinadən xəbər verir ki, Aİ-də müzakirə olunan sanksiya alətinin əsas məqsədi ölkələri Rusiyanı xilas etməkdən çəkindirmək və Moskvanın məhdudiyyətlərdən yayınmaq üçün potensial olaraq istifadə edə biləcəyi ticarət kanallarını kəsməkdir. Mexanizm uğursuz olarsa, növbəti addım əsas mallara yönəldilmiş məhdudiyyətlər olacaq.

Aİ-nin sanksiya mexanizmi Üzv Dövlətlərə iki sanksiya siyahısı yaratmağa imkan verəcək: biri sanksiyalara məruz qalan üçüncü ölkələr üçün, digəri isə qadağan olunmuş mallar üçün. Siyahılarda hansı ölkələrin və məhsulların yer alacağına dair qərarı üzv ölkələr yekdilliklə verəcək.

Həmçinin, Bloomberg mənbələrinə görə, Aİ artıq mövcud olan bəzi ixrac nəzarət tədbirlərinin əhatə dairəsini genişləndirmək və Rusiya ərazisindən tranzit keçən çoxlu sayda malların satışını qadağan etmək niyyətindədir. Bu tədbirlərin üzv ölkələrin aprel ayından müzakirə etdiyi Avropa İttifaqının Rusiyaya qarşı yeni, on birinci sanksiyalarının bir hissəsi olacağı gözlənilir.

Ukraynada genişmiqyaslı müharibə başlayandan bəri Qazaxıstan, Birləşmiş Ərəb Əmirlikləri, Türkiyə, Çin və digər ölkələrdən Rusiyaya yarımkeçiricilər və inteqral sxemlər kimi malların idxalı kəskin şəkildə artıb.