"Maduro istefa versə ona amnistiya tətbiq edə bilərik" - ABŞ

Yazar Bizimxəbər 2024-08-12 15:05:43 6269

ABŞ Venesuela prezidenti Nikolas Maduronun könüllü istefası müqabilində ona amnistiya təklif etmək imkanını nəzərdən keçirir.

Bizimxeber.az bildirir ki, bu barədə "Wall Street Journal" yazıb.

Qərar Vaşinqtonun mübahisəli prezident seçkilərindən sonra Venesuelada siyasi böhranı həll etmək strategiyasının bir hissəsidir.

Nəşrin məlumatına görə, ABŞ artıq ABŞ Ədliyyə Nazirliyi tərəfindən ittiham olunan Maduro və onun əsas köməkçiləri üçün əfv haqqında danışıqlar aparır. Vaşinqton Maduronu gələn ilin yanvarında səlahiyyət müddəti başa çatana qədər prezidentlikdən getməyə razı salmağa çalışır.

ABŞ prezidenti Co Bayden administrasiyasına yaxın mənbələrdən biri qeyd edir ki, Maduro və ətrafı üçün amnistiya onun hakimiyyətdən uzaqlaşdırılması üçün mühüm alətə çevrilə bilər. ABŞ-ın Venesuelanın yeni prezidentinin andiçmə mərasiminə qədər məhdud vaxtı var və bu razılaşmanın əldə olunması noyabrda ABŞ-da keçiriləcək seçkilərin nəticələrindən asılıdır. Donald Tramp qalib gəlsə, Venesuelaya qarşı aqressiv siyasətə qayıdış riski var, çünki Tramp administrasiyası artıq sanksiyalar tətbiq edib və ölkədəki müxalifət hakimiyyətini dəstəkləyib.

Nicolas Maduro bildirib ki, ABŞ ona hörmət göstərərsə, danışıqlara hazırdır. Bununla belə, Bayden administrasiyası tərəfindən əksər iqtisadi sanksiyaların götürülməsinə baxmayaraq, Maduro hələ də Amerika siyasətinə şübhə ilə yanaşır.