İnterpolun Moldova nümayəndəliyinin rəhbəri Viorel Çentiu korrupsiyaya qarşı mübarizə prokurorlarının apardığı axtarışlardan sonra Kişinyovda saxlanılıb. 

"Azadlıq radiosu”nun Moldova xidmətinin məlumatına görə, Çentiu və Moldovadan olan digər rəsmilər dünyanın müxtəlif yerlərindən beynəlxalq axtarışda olan ən azı 20 tanınmış cinayətkarın adlarının İnterpolun siyahısından çıxarılmasına kömək ediblər.

Çentiu ilə birlikdə Daxili İşlər Nazirliyinin Baş Miqrasiya Müfəttişliyinin rəisi Mixail Vode, habelə Moldovanın keçmiş ədliyyə naziri və ölkənin İnterpoldakı keçmiş nümayəndəsi Vitali Pırloq və vəkil Oleq Mıtse saxlanılıb.

Moldova Respublikasının Korrupsiyaya Qarşı Mübarizə Prokurorluğu aprelin 2-də cinayət işi açıb. Moldova rəsmiləri cinayətkarların İnterpoldan qaçmasına kömək etdikləri iddiası ilə saxlanılıb.

İyunun 4-də Moldova Respublikasının antikorrupsiya prokurorları Fransa zabitlərinin və ABŞ Federal Təhqiqat Bürosunun (FTB) dəstəyi ilə 12 nəfərin üzərində 33 axtarış aparıblar. Korrupsiyaya Qarşı Mübarizə Prokurorluğunun rəhbəri Veronika Draqalinanın keçirdiyi brifinqdə bildirilib ki, açıqlanan reydlər nəticəsində 4 nəfər 72 saat müddətinə saxlanılıb. Mobil telefonlar, noutbuklar və kompüterlər də daxil olmaqla bir neçə cihaz müsadirə edilib və onların məzmununu araşdırmaq üçün FTB-dən kömək istənilib.

Birgə istintaq çərçivəsində indiyədək toplanmış sübutlara əsasən, müxtəlif millətlərdən olan bir qrup şəxs İnterpolun "qırmızı bildiriş”lərinə tabe olan şəxslərin Moldova Respublikasında və digər ölkələrdə sığınacaq və ya qaçqın statusu almasına və  beləliklə də axtarışda olanlar siyahısından çıxarılmasına imkan verən iddia edilən korrupsiya sxemi həyata keçiriblər. 

Korrupsiyaya Qarşı Mübarizə Prokurorluğu bu cinayət işini Fransa Milli Maliyyə Prokurorluğundan (PNF) daxil olan məlumat əsasında açıb. Moldova prokurorları iddia edirlər ki, onlar da sonradan Britaniya hakimiyyət orqanlarından müvafiq məlumat alıblar.

İnterpol (ingiliscə "International Criminal Police Organization" termininin abbreviaturası) transsərhəd cinayətlərin qarşısının alınması və onunla mübarizə məqsədi ilə polis qüvvələrinin əməkdaşlığı üçün beynəlxalq təşkilatdır. 1923-cü ildə yaradılan təşkilata 195 üzv dövlət daxildir. Viorel Çentiu 2016-cı ildən İnterpolun Moldovadakı ofisinin baş komissarıdır.