Britaniya da İrana sanksiyalar hazırlayır

Yazar Bizimxəbər 2024-09-12 10:51:06 1971

İranın müvəqqəti işlər vəkili Britaniya XİN-ə çağırılıb. 

Bizimxeber.az bildirir ki, çağırış, İranın ballistik raketlərinin Rusiyaya təhvil verilməsi ilə bağlı yaranan narahatlıqdan irəli gəlib.

Böyük Britaniya Xarici İşlər Nazirliyi, İran səfirliyinin rəhbərinin çağırılmasının "Avropalı tərəfdaşlarla razılaşdırılaraq və xarici işlər nazirinin göstərişi ilə" baş verdiyini açıqlayıb.

Nazirlik qeyd edib ki, İranın ballistik raketlərinin Rusiyaya hər hansı şəkildə təhvil verilməsi "əhəmiyyətli reaksiyaya səbəb olacaq təhlükəli eskalasiya" olaraq qiymətləndirilir.

Bu çağırış, bir gün əvvəl İranın Hollandiyadakı səfirliyinin rəhbərinin Rusiyaya yeni hərbi yardımla bağlı çağırılması ilə əlaqədar xəbərlərdən sonra gəlib. Böyük Britaniya, həmçinin, İranın pilotsuz təyyarələr və raketlərin istehsalı ilə məşğul olan fiziki və hüquqi şəxslərinə, eləcə də İran raketlərinin Rusiyaya daşınmasında iştirak edən Rusiya yük gəmilərinə qarşı sanksiyalar tətbiq edib.

ABŞ Dövlət Katibi Entoni Blinken, bir gün əvvəl İranın Ukraynada istifadə üçün Rusiyaya ballistik raketlər təhvil verdiyini təsdiqləyib. Bu, Tehrana qarşı yeni sanksiyaların tətbiqini qaçılmaz edir.