Bayden Vaşinqtonda İsrailin baş nazirini qəbul edəcək

Yazar Bizimxəbər 2024-07-21 14:23:52 6968

İsrailin baş naziri Benyamin Netanyahu Vaşinqtonda ABŞ prezidenti Co Baydenlə görüşəcək.

Bizimxeber.az bildirir ki, bu barədə "DPA" xəbər verib. 

Netanyahunun bazar ertəsi ABŞ-a uçacağı gözlənilir, İsrail baş nazirinin mətbuat xidməti bildirib. 

ABŞ və İsrail liderləri arasında keçiriləcək danışıqlarda ilk növbədə Qəzzada münaqişədə atəşkəsin təmin edilməsi və girovların azad edilməsi səylərinin müzakirə olunacağı gözlənilir. 

Netanyahunun ABŞ Konqresinin hər iki palatasında İsrailin Qəzzada hərbi əməliyyatları ilə bağlı çıxışı planlaşdırılır.

Bayden və Netanyahu sonuncu dəfə keçən il oktyabrın 7-də HƏMAS-ın kütləvi hücumundan qısa müddət sonra Təl-Əvivdə şəxsən görüşüblər. 

Netanyahunun xarici səfəri İsraildə tənqid edilib. Etirazçılar ondan yalnız girovların azad edilməsi ilə bağlı razılığa gəldikdən sonra ölkəni tərk etməyi tələb ediblər.

Bayden və Netanyahu arasında münasibətlər gərgin hesab olunur. Bu yaxınlarda İsrailin baş naziri ABŞ hökumətini silah tədarükünü gecikdirdiyinə görə kəskin tənqid etdiyi videonu dərc edərək böhrana səbəb olub.