Avropa İttifaqı Krımdakı seçkiləri pislədi

Yazar Bizimxəbər 2024-09-09 15:18:25 2524

Avropa İttifaqı (Aİ) Rusiyanın işğal altında olan Krım və Sevastopolda keçirdiyi yerli seçkiləri sərt şəkildə pisləyib.

Bizimxeber.az xarici KİV-lərə istinadən bildirir ki, Aİ-nin xarici diplomatik xidmətinin sözçüsü Piter Stano deyib ki, sentyabrın 6-8-də keçirilmiş bu qondarma seçkilər beynəlxalq hüquqa ziddir və heç bir hüquqi nəticəyə malik deyil.

O, Aİ-nin bu seçkiləri etibarsız hesab etdiyini və Krımın Ukraynanın tərkibində olduğunu vurğulayıb.

Stano əlavə edib ki, Rusiya Ukraynaya qarşı qeyri-qanuni işğal müharibəsini dərhal dayandırmalı və beynəlxalq sərhədlər daxilində Ukrayna ərazisindən qüvvə və texnikasını çıxarmalıdır.

Sentyabrın 8-də Rusiyada müxtəlif səviyyələrdə keçirilmiş seçkilər Ukrayna Xarici İşlər Nazirliyi tərəfindən qeyri-legitim və dəyərsiz hesab edilib. Nazirlik bu seçkilərin nəticələrini tanımadığını bəyan edib.