Bakıda “KİV və müəllif hüquqları” mövzusunda konfrans keçirilib
Bakıda  “KİV və müəllif hüquqları”  mövzusunda konfrans keçirilib
19 Avqust 2016 / 19:03 / Baxış sayı: 752
Font1 Font2 Font3 Font4
Bizimxeber

Bizimxeber.az saytına verilən məlumata görə, mediada İnnovativ Təşəbbüslərə Dəstək İctimai Birliyi (MİTDİB)  Bakı  şəhərində “KİV və müəllif hüquqları” mövzusunda konfrans keçirib.  Beynəlxalq Mətbuat Mərkəzində  keçirilən konfransa KİV təmsilçiləri və internet fəalları qatılıblar.

Tədbir, Azərbaycan Respublikasının Prezidenti yanında  Qeyri-Hökumət Təşkilatlarına Dövlət Dəstəyi Şurasının maliyyə yardımı ilə həyata keçirilən ““İnternet informasiya resurslarında müəllif hüquqlarının qorunması təşəbbüslərinə  yardım” layihəsi çərçivəsində baş tutub.

Layihənin koordinatoru Müşfiq Ələsgərli bildirib ki,  tədbirin  keçirilməsində məqsəd KİV işçilərində, xüsusən, internet üzərindən xəbər yayan informasiya istehsalçılarında müəllif hüquqlarının qorunmasının vacibliyi barədə təsəvvür formalaşdırmaqdan ibarətdir: “İnternetin inkişafı KİV-də müəllif hüqqlarının qorunmasını çətinləşdirib. Baxmayaraq ki, müəllif hüquqları həm qanunlarla qorunur, həm də ona hörmətlə yanaşılması Jurnalistlərin Peşə Davranışı Kodeksinin əsas tələblərindən biridir. Amma təəssüflə qeyd edilməlidir ki, bu gün əksər xəbər istehsalçıları müəllif hüquqlarına nəinki hörmətlə yanaşmırlar, ümumiyyətlə bu sahədə anlayış geniş yayılmayıb. İnternetin inkişafı,  medianın rəqəmsal müstəviyə köçməsi  müəllif hüquqlarının qorunmasını çətinləşdirib. Həyata keçirdiyimiz layihə və tədbirlər  bu problemin aradan qaldırılmasına yardım xarakteri daşıyır”. 

Konfransda iştirak edən CASCFEN sədri Azər Həsrət və   AJN sədri Ayaz Nizamoğlu onlayn media müstəvisində müəllif hüquqlarının qorunması üçün tətbiq edilən yeni texnoloji mexanizmlər barədə məruzə ediblər.  JAM sədri Seymur Verdizadə, TUMİB sədri Çingiz Bayramov, “Azadinform” İnformasiya Agentliyinin baş redaktoru Niyaz Niftiyev,  “Region plus” Jurnalının baş redaktoru Namiq Mailov, “Trend” İA təmsilçisi Elçin Hüseynov, Lider TV-dən Elnur Niftəliyev, “Millətçilik” qəzetinin baş redaktoru Pərviz Qasımov, VTİHİB sədri Teyyub Mirqasımov, AzPress.az-ın baş redaktoru Rasim Sadıqov çıxışlarında müəllif hüquqlarının qorunmamasının peşəkar KİV-lər və jurnalistlər üçün yaratdığı problemlərdən bəhs edərək, keçirilən konfransın bu sahədə yeni proseslərə yol açacağını vurğulayıblar.

Məlumat üçün qeyd edək ki, layihə çərçivəsində ölkənin Qərb, Cənub və Şimal-şərq bölgəsində fəaliyyət    göstərən media təmsilçiləri üçün  seminarlar da keçirilib. Həmçinin, layihə çərçivəsində media ekspertləri və hüquqşünasların iştirakı ilə  “KİV və müəllif hüquqları” adlı vəsait də çap  edilib,  jurnalistlər arasında pulsuz paylanır.

Bizimxeber.az

 

 



Şərh əlavə edin







Yuxarı Geri Ana səhifə